Pregrada.info - nezavisni pregradski portal

Bila je to mala senzacija kad su šezdesetih pri Ivanjku kampirali "Austrijanci". Tata, mama i tri kčeri Vindiš - Helga, Pupi i Hajdi. Stari Franc Ivanjkov im je ustupil prostor za šator, malo dalj od našeg nogometnog igrališta.

Austrijanci su dolazili sako leto svojim folcom, postavili šator i ostajali čez sezonu.

A pri Ivanjkima sam ionak bil kuhan i pečen. Dole je bila moja klapa, a prijatelj Marijan je živel h Lavoslavovom dvoru, gore na breščeku.

Tak bi mi sedeli polek čelinjaka, jeli Francove črešnje i lukali puce. Helga i Pupi su bile stareše srednjoškolske, a Hajdi otprilike moja vršnjakinja.

Hajdi je bila vitka i zgodnička. Mela je lijepe zube, žive plave oči i duge lasi. Kad se nasmejala na obrazima bi joj se napravile male jamice. Dopala mi se mam samo kaj sam na avanturu ipak moral čakati do te njihove zadnje sezone h Toplicama. Do tad sam skupil čist solidno iskustvo kaj se tiče balavanderskih ljubavnih špelancija jer ta me je tematika navek zanimala. Sad je trebalo konačno stvar kapitalizirati a bolje nemre nek kad priča poprimi "internacionalni karakter".

Tak da sam tu sezonu napravil baš pravi presing. Hajdi je bila moja i božja - kud ona, tud ja. Po cijele smo se dane kupali na bazenima, špricali, loptali, spominali na prste i grimase i jeli sladolede kaj nam je kupuval njen stari. Jer videl je i on da "tu nekaj smudi", ali valjda mu je to bilo nekak simpatično pa je toleriral. Znal je da sam dečec z jarka i gde sam doma. Nije štel komplicirat.

Čak je pustil da Pupi i Helga malo šalabajzaju okolo z nekim Topličanima, jer ipak su to bile nore šezdesete, Vudstok, hipi priča, mejk lav not vor...

 

I tak je leto prolazilo se dok nisam saznal da se za vikend austrijska ekipa pakira nazaj. Slučajno ili ne, te dane smo se nekak posebno zbližili. Sanjarili smo i mesečarili naveliko, a leptiri su se naganjali po trbuhima obostrano. 

Ali trebalo je biti i nekakev taktičar. I moralo se za delikatnije prilike malo bolj navčiti komunikacija, točneše, stranjski jezik.

Tu baš nisam mel sreče jer smo h školi vučili ruski. Čak mi je prek glazbe i filmov engleski išel dost dobro, ali njemački baš i ne.

Zato sam iskoristil našega stričeka Jankeca. On je njemački nekim čudom govoril prilično glatko.

Dok sam pasel Pergu ispod stričekovog ganjka, počel sam ga spitaviti.

- Striček, kak se veli na njemačkom "ja"?

- Ja? - Ih!

- A kak se veliiii..."volim"? (to sam onak zaobilazno, da ne skuži).

- Volim? A kaj ti prafzapraf trebaš reči, dečec?

- Ja te volim! - bubnul sam hrabro.

- Pa tak mi reči. Ih libe dih! A kaj ti to treba?

Mučal sam, a kaj bum. Striček pak se mudro smejal.

Ipak, iskoristil sam priliku i začas navčil još dvije fraze kaj dobro dojdeju; "hojte ist ajn šejner tag" i "du hast šejne augen".

 

Došel je konačno i taj vikend prije fajrunta. Stari je Austrijanec štel kupiti od strica Tonča par litri rakije, a ja sam se brzo pogurnul da bi tu mogel pomoči. Jer stric Tonč, Marjanov dedek, je bil naš prvi sused na brijegu. Dogovor je bil h nedelju popoldan da se to riješi. Dečki od Helge i Pupi su se takaj ponudili, tak da je stvar začas dogovorena.

H nedelju smo još do obeda igrali nogomet i h pauzama jeli fine kolače Francove Terezike. Razme se da su lopte svako malo frcale baš prema austrijskom šatoru a puce nam ih dodavale. Od "danke, danke" su nas več jeziki boleli.

Onda sam prešel doma. Skupal sam se na zdencu i oblekel najbolje hlače i majicu. Taman sam popravljal šiške kad je došel brat Dragan nek mu pomorem traperice zažmikati. Tobož usput, spomenul sam avanturu. 

Počele su muške spike.

-  I? Kaj ste se vi opče kušnuli?

-  Malo... onak - lanul sam iskreno.

-  Kak to misliš "onak"? Filmski, z jezikom?

E sad me tu malo zbunil. Znal sam za taj "filmski" i da mi je suđen po horoskopu, ali kaj bi to točno trebalo biti? Je, gledal sam ja puno filmov gde su se "žvalili", bilo je toga i na bazenima, ali koja je to tehnika z jezikom?

Kad smo konačno zažmeknuli traperice, Dragan me prodorno pogledal i rekel.

- To se z jezikom dela... Viš ovak. Kak zmija, ali polahku.

Memoriral sam tu sliku i pokušal povezat s kušuvanjem Ben Kvika i Klare Vorner iz megapopularnog "Dugog, toplog ljeta".

Ipak, dok sam išel prema Ivanjku ko Dok Holidej na obračun kod OK Korala, malo mi je toga bilo jasno. Ko za inat, hutim našim igrami "tate, mame i doktora" sega je bilo, ali tih filmskih pus baš i ne. Lažem. Opče nič!

Pri Ivanjku su polek čelinjaka čakali dečki z Toplic. Oko šatora pak su se nestrpljivo motale puce oblečene h duge hipi-haljine.. Hajdi je prek ramena prebacila malu torbicu z coflekom. Bila mi je super zgodna.

Deli smo glaže h logožar, zeli peneze i polahku zaprašili prema Tonču, baš kad je na tranzistoru zaigrala "Lutka na koncu", Sendi Šo.

Lijepo je to zgledalo, baš romantično. Z rukami oko pasa ispred nas Helga i Pupi sa svojim "ljubavnicima", a nas dvoje desetak metri iza njih.

Kad bi došli do visokih koruza, ovi napred malo bi se "opustili". Ruke su kliznule nisko, a kušuvali su se filmski.

Ali to su bili oni. Kaj sam ja bogec mogel kad me sako malo zestal neko poznati.

Terezika Korundova nas je spazila pri potoku i samo gledela. Dok smo prolazili mimo, čul sam kak govori; "Viš ti našega Marcelja. Duo bi si to mislil?".

Tak da sam ja svoju priliku čakal h povratku.

Konačno smo doplazili na naš brijeg. Dok se kupuvala i natakala rakija, skočil sam f hižu proverit h špiglu jel sve štima. Taman kad sam si tresel jabuku nad zdencom, došel je Helgin frajer.

- Čuj Marcel, ovak. Sad kad se spustimo do njiva, idemo z njimi h koruzu. Posle bumo si fučkali kad bu gotovo. A pri Križu se najdemo.

Malo kesneše se naša procesija počela suštati uz klanec. Ispod su bile koruze z jene i druge strani. Dečki su Helgu i Pupi odvlekli lijevo h našu, a ja sam Hajdi cuknul h desnu, Korundovu. Lamatili smo po koruzi se dok nismo došli do mesta gde nas niko nije mogel videti.

Kad smo se konačno zastanovili, privlekel sam Hajdi k sebi, pogledal značajno h oči i propental;

- Du hast šejne augen... Ih libe dih!

Hajdi se nasmejala. Malo je i počrljenela. Počel sam joj dragati lasi i lice. Zaprli smo oči i taman kad smo se nameravali filmski kušnuti, bubnuli smo jen drugoga h zube tak da je zazvonilo.

- Auč! - zajahkala je. Usnica joj je bila malo rasekana. A bormeš ni moj nos nije najbolje prošel.

Zgleda da smo mi to nekak skroz krivo zamislili. Lahko je zdaj filozofirati, ali onda nismo znali da filmski počne z običnom pusom, a jezik dojde poklje na red. I da pritom treba ipak bar malo gledeti.

Neugodnjak, definitivno. Ali svako zlo za neko dobro. 

Kak je Hajdici usnica lagano krvarila, prvo sam ju počel z rupčekom brisati. Čist spontano i kušuvati. Onak, kak spada. Po abecedi i bez žurbe. Posle je to preraslo h jenu od najljepših pusa kaj se sečam. Sve je totalno selo na svoje mesto. Čak i famozni jezik.

Jen cajt smo tak stali zagrljeni i drgetali kak šibe na vodi. Sve dok nisam začul fučkanje.

Zišli smo z koruze polahku, ko pravi ljubavni par, makar se nič posebnog osim puse nije dogodilo.

Pri Križu smo se stepli od lupinja i onih koruznih mustačov.

Nastavili smo prema Ivanjkima, stisnuti kak dvojčeki. Osečali smo se tak povezano da su riječi bile nepotrebne. Čak ni "hojte ist ajn šejner tag" nisam se setil reči. To opče nije bilo važno.

Blizu Julčove štale Hajdi je iz torbice zvlekla penkalu i notes. Na jenom je listu napisala svoje ime, prezime i adresu, a na drugom sam ja dopisal svoje.

Dala mi je listek i kušnula me. Onak, obično. I ja sam nju obično kušnul makar sam štel filmski. Ali hodilo je preveč ljudi okolo. 

Kad smo se pozdravili več je padala noč. Baš tad naišel je kum Hajsek z koli. Skočil sam na svoru i dugo joj mahal.

Bil sam malo žalosten ali i ponosan. I bratu bu drago kad mu spripovedam avanturu. Onaj nespretni moment morem glatko preskočiti, netreba sve znati. 

Bilo je to zadnji put kaj sam videl Austrijance i Hajdi Vindiš iz Beča. Dvaput sam dobil njene razglednice i jeno pismo napisano na ružičastom papiru z medekima. I to je bilo to.

 

Eh, Hajdi, generacijo moja.. Da te nisam upoznal vrak zna s teruj bi moral filmske puse vježbati. Ne daj se, Hajdi. Ne daj se godinama, moja Hajdi..