Pregrada.info - nezavisni pregradski portal

Foto: Josip Krušlin

Husta se zeleni. Liepa pretilet raste okoli nas. Naše oči su vesele ka moreju ljukati kak od mertve, zimske slike prirode, nastajeju rajski pejzaži zelenega i cvetnega Zagorja. Či glediš na Google Earth-u, naš zavičaj je kak leopardavu kerznu prešaran s hustami. Huste su oko nas, negda sma več, a negda mej svesni tega. Une su uveke tuj, a mi jih se zmislima samu retku keri krat. Nete mi zameriti ka nuo kaj je pred vamuj nie klasificierani seminarski rad. Jas hustu mam rad drukčije.

Huste h Zagorju rasteju na briegaf i na guoraf. Na severnih stranah jih je več, tam je mej sunca, a na južnih stranah jih je mej, a tam su bolj traniki, tersja i ive. H ravnici je retku kera husta.

Pitam se, aj bu na našem puolju zrasla husta? Na Islandu ne raste niti jena husta, h Brazilu jih je se mej, a h našem puolju bi mogal biti spas! Tam buju naša pljuča!

Či češ i či dojdeš h pravu duob, fusti moreš posljušati koncert. Koncert majstori su dobru raspoređeni , a najbolj dobru raspoloženi ranu hjutra i pred večer.

Hnuogi čovek fustu najrajši ide koncertierat z motuorkuj. Či je pameten, zna da mu je najbuolje iti još z nekim, a dok se postavi na veliku drievu, zna da prema takvemu treba meti poštovaje.

No, dobru, spomenil sam tie najgerši, za hustu morbidni diel, pa zde morem iti delj.

Či fusti vidiš puhe, kunu zlaticu, kaču, lesicu, jazafca, sernu, zajca, mađaruona ili keru got drugu husnu živinu, daj jim mier i vugni jim se sputa. Uni ti nečeju nič i takaf budi ti pruoti jim.

Ne pozabiti, husta je živa, ne samu živad hu ji, nek i saki korenček i saka viečica! I po letu i po zimi.

Či si se nastanil čistu puolegi huste ili h sami husti, more biti da buš duobil nadimak – Hušak. Na standardnem hrvackem jeziku bi te onda zvali – Šumak.

Dvajst devete je bila tak jaka zima ka su ljudi sela čuli kak husti bukve pukaju. Mi sma se fusti igrali rata. Jeni su bili partizani, a drugi Niemci. Nigdu nie htel biti Niemec.

Listje za štrajiti blagu se je fusti zubljalu h jesen i na vozaf gmof vozilu. Šumarija je čak davala h najam diele huste ljudima za zubljaje. Zde je listja kuliku češ i nigdu ga ne treba. Buog zna kaj bi mi rekli h Krapini, na šumariji, da dojdem i velim da bi trebal za vuoz listja z državne huste...

Fusti rasteju gljive. Se su jestive. Duo ne zna kak ide delj tuo z gljivami, naj nijde fustu gljive brat.

Bilu je nakvih ke su si fusti našli baš liepu vieku za obesiti se. Sikakih nas je...

Fusti je, sred bielega dneva, popievala suova, na dien dok je hmer Tito. Nijbi vierval da niesam čul. Fusti na pretilet, najpriet se zeleniju niske biljke, a komaj onda visoke.

Jen je fusti pal z bukve dok je optergaval vieje, pa je uostal h nesvesti ležati. Došli su onda jengavi i drugi ljudi sela, naluožili ga na šraglje i nosili žalosni gmof. Na puol puta se je onda onesvešteni zberknil, skuočil šragljaf i h kaluop odbiežel gmof, na Škreblinaf brieg. Kak da mu nije nič, ali je poklje ipak tri kedne ležal h postelji.

Fusti sam zrušil hrast i gaciju, dal sam na pilanu zažajgati i napravil malu kliet. Moja deržava misli da jas ne znam sam čuvati svoju hustu.

Dok jaku puše veter, donese s huste na naše dvoriše listje hrastavu i bukavu, po zraku, petsto metri daleku.

Najbuolji viterjaki su bili fusti, na južnih padinah Kunagore. Mladi ne znaju kaj su tuo viterjaki.

Bukavu hustu zuovema bukavje. Ne znam, zakaj hrastavu hustu (kakva raste na Kunagori) ne zuovema hrastavje?

Tatek nas je vuodil prek Velike ravne, čes hustu, na Kostelgrad, na izlet. Onda sam tam pervi krat pil Coca colu. Z staklene litrenke pilu je nas osam. Sakemu deci i još malu.

Dok sma bili dieca, fusti sma si hteli napraviti hižicu. Malu, samu za se. Počeli sma, ali ju niesma nigdar deli pod krof.

Bežajski baruon je bil luovec i rad je huodil po hustaf. Fusti su ga hbili partizani. Okoli mesta na kerem je negda bila kapiela, h Gorjakavem, na Hduovičavem briegu, raste husta.

I na Kunagori, ke je negda bilu tersje, raste husta.

H Bučecaf su mladi h omladinski radni akciji, sadili hustu.

Nam je negdu h Guori, ke mama hustu, devedeset druge, treče, zrušil, hkral i otpeljal cielu hustu. Niesma znali duo je, niesma meli dokazaf, mogli sma samu tužiti nepoznatega počinitelja. Od jada, čovek bi sam sebe pojel.

Fusti moreš vidati malu zelenu žabu ke se zuove Poscani Tomaš. Jeni veliju da se tak zuove zatu ka se pohči po tebe či ju primeš h ruke, a drugi pa da tuj žabi, saki krat dok skoči, malu hvujde.

Fusti, h kakvi kolotečini, sred leta moreš najti vuode i blata. Dok je po nuoči fusti šibje pukalu i nekaj je fist kmečalu i tulilu, rapšici ke su bili h čaki su se tak splašili ka su biežali jen po drugem. Negdu je zakričal da ide orangutan, a jen je zgubil staklenu oku dok je zletel s huste i preskuočil jemenik.

Fusti je Neveselčaf Blaž, kerega bum tuj samu kratku spomenil, ali kerega po pravem ide punu več pisaja, spuknil mladu bukvicu, debelu kak hamper i donesal ju gmof na ramenu. Bukvica je bila na dvorišu, a koreje se je još vlieklu po husti, z druge strane briega. Dok ju je hitil dole, zemlja se je tak stresla ka je fiži betežna babica pala s postelje.

Fusti je tie isti Blaž hluovil veverjaka. Dok su ga doma razdelali, bil je skoru puni potškavjak mesa, a masti su meli za cielu zimu.

H Mariji Gorici za hustu veliju loza, a h Bistri šuma.

Čes hustu, po jenem klancu, krivu su skrenile krave s punim vozam gjuoja za tersje. Poguonič je skrelil lievu, a krave diesnu, hnaduol. Une su s tim vozam šle kaj si vragi, a dok su došle do ravnega nij več bilu ni gjuoja ni voza. Samu je rud bil med kravami, naklejen h jarmu.

Fusti je jen drugega hdošal h zube mu je naštuopal listja ka nijbi mogal kričati, pa mu je zel se peneze. Poklje tie jen, jen cajt nij huodil fustu. Zaposlil se je h Lepoglavi.

Jen drugi, a tie zbiljam nie bil pameten, došal je po nuoči h ljudski fčelijak da bu hkral med. Otper je košnicu i zagrabil, tak ka su ga fčele cielega spikale. Jahkal bi, ali nij hupal, ka ga nijbi čuli. Kričal je i klel komaj hbrieg po husti, dok je hvušal sela, tak ka su ljudi šli vun, posljušat tie krič.

Fusti dobiš kluoša. Tie vrabec, fala Bogu, nie zaštičena versta. Malega zdruckaš z noktima, a na velikega slobanu staneš.

Pri nas nigdu ne veli:"Idem f hustu." Mi si jednostavnu "h" meknema proč, nalepima "f" na ostatek i velima:"Idem fustu."

Jas idem rad fustu, a dok nemam cajta, dok sadima krumpier ili dok šrafam po traktoru, rad stanem, pogledam proti našemu bukavju i mislim si: "Kak je liepa husta!"